I. Pupuh: Wargasari Kamoksaan
A. asepe ye' karegepang
pasepane' dewi pertiwi' jati
geni' sanghyang' brahma iku
kumenyane' bhatara siwa' iku
majegau' sada siwa' iku
cendanane' parama siwa
dupane' hyang pra'mesti
B. kastangine'sanghyang dharma
ikang kukus sanghyang is'wara
ida mangkin' meraga geni
marupa' ongkara' iku
ang ung mang' aksaran' iku
merik mingging, ambune
merik sanghyang bayu nadi
II. Pupuh: Brahma Ngisep Sari
A. mogi'tan kecakra bawa
titiang ika' tunan sami
nista kaya wak lan manah
langgeng ngula'mi hyang widhi
sang suksma maha chinyta
nirbawa siwa kasengguh
singidang ring' tampak aksi
B. om om sembah ning anatha
dumajak jua' keaksi
mungguing pangebaktin titiang
dyastun langkung'tuna sami
pakirang artha wibawa
nista solah lawan wuwus
muwuh banget' hina buddhi
C. kawenten sredaning manah
miwah katlebaning hati
kalawan eling tan pegat
kanggen manyangra manyuwun
suwecan i ratu sane luwih
D. i ratu langkung pawikan
maring manah sarwa dumadi
ne jati kalawan boya
ne congah lawan budhi nulus
ne patur kalawan rusit
III. Kidung Kawitan Warga Sari
A. purwakaning anggripta rum
ning wana ukir
kahadang labuh
kartika' panedenging sari
angayon tanguli ketur
angringring' jangga mure
B. sukania harja winangun
winarna sari
rumrumning puspa
priyaka' ingoling tangi
sampuning risris sumawur
mungguwing srengganing rejeng
IV. Kidung Warga Sari
A. ida ratu saking luhur
kawula nunas lugrane
mangda sampun titiang tandruh
mengayat bhatara mangkin
titiang ngaturang pejati
canang suci lan daksina
sami sampun puput
pratingkahing saji
B. asep menyan majagau
cendana nuhur dewane
mangda ida gelis rawuh
mijil saking ruhuring langit
sampun medadaban sami
maring giri meru reko
ancangan sadulur
sami pada ngiring
C. bhatarane saking luhur
ngegana ring ambarane
pangangene sarwa murub
parekan sami mangiring
widyadara wdyadari
pada madudon-dudonan
prabhawa kumetug
angliwer ring langit
D. di bale manike luwung
mapanyengker ring telagane
kadagingin tunjung tutur
tunjung abang tunjung putih
ring madyaning bale alit
nganget sekar jepun
sekar sane wangi
E. ring bale emase parum
linggih ida bhatarane
bale emas ngranyab murub
upacara sarwa luwih
leluhure sutra putih
ida bhatara mebawos
bawose di luhur
pacang turun gelis
F. asep pejati wus katur
mendak ida bhatarane
peneteg lan canang harum
canang gantal canang sari
parekan pada menangkil
pedak sami nunas ica
nyadpada manyungsung
nagaturang pelinggih
V. Ritatkala Nunas Tirta
A. Turun tirta saking luhur
ne nyiratang pamangkune
makalangan muncrat mumbul
mapan tirta merta jati
paican bhatara sami
panglukatan dasa mala
sami pada lebur
malane ring bumi
B. maketis ping tiga sampun
pabahan siwa dwarane
wasuhane raris inum
ping tiga lantas masugi
ring waktra magentos genti
toya amerta hyang widhine
sami sampun puput
mengalangin hati
VI. Tembang Adri
A. sampun puput titiang ngelungsur
nunas tirta ne'mangkin
tirta suci maha sidhi
panglukatan lara agung
pabersihan latah lutuh
ring sekala muah niskala
titiang mangluhurang hatur
ngaturang suksmaning manah
om sidhirastu nama svaha
B. egar manah ira ngesti ayu
ngesti bhatarane
kalih ida sang hyang widhi
mangda ica ida nerus
betel kangin betel kawuh
ngulayang ika welas arsa
angestyang brata sadhu
ngesti ida hyang bharata
nusas sarining amerta
VI. Pangaksama
pangaksama ne kaluhur
nunas wara nugrahane
manawi kirang ne katur
agung sinampura ugi
canange asebit sari
apang ica ida nonton
nodya saking luhur
mamuputang sami
